Buxgalterning kasbiy va shaxsiy ko‘nikmalari ish beruvchi rezyume bilan tanishayotganda birinchi navbatda e’tibor qaratadigan muhim omillardan biridir. Buxgalter o‘z lavozim vazifalarini xatosiz bajarishga imkon beradigan yetarli bilim, tajriba va shaxsiy fazilatlarga ega bo‘lishi lozim.

Ushbu maqolada yaxshi ish topish uchun rezyumeda ko‘rsatish zarur bo‘lgan buxgalterning asosiy ko‘nikmalari haqida batafsil ma’lumot beriladi.

Buxgalterga yaxshi ish topishda qaysi ko‘nikmalar yordam beradi?

7487 nafar ishtirokchi (direktorlar, kadrlar bo‘limi xodimlari va buxgalterlar) o‘rtasida o‘tkazilgan keng ko‘lamli tadqiqot natijalariga ko‘ra, ish beruvchilarni eng ko‘p qiziqtiradigan 10 ta asosiy ko‘nikma aniqlangan. Quyida ular ahamiyat darajasiga ko‘ra keltiriladi.

1-ko‘nikma — soliqlarni optimallashtirish qobiliyati

Ish beruvchilar uchun eng muhim talab — soliqlarni qonuniy yo‘llar bilan kamaytirish usullarini bilish va amalda qo‘llay olishdir. So‘rov natijalariga ko‘ra, ish beruvchilarning 87 foizi soliq xavflarini oldindan baholay oladigan va ularning salbiy oqibatlarini hisoblab beradigan bosh buxgalterni izlaydi.

Bosh buxgalter nafaqat soliqlarni optimallashtirishi, balki kompaniya va direktor uchun mavjud bo‘lgan barcha moliyaviy xavflarni ham tushuntirib bera olishi kerak.

2-ko‘nikma — tajriba va doimiy malaka oshirish

Ikkinchi o‘rinda kasbiy tajriba turadi. Ish beruvchilarning 55 foizi bir vaqtning o‘zida bir nechta kompaniya hisobini yurita oladigan bosh buxgalterlarga ehtiyoj sezadi.

Qo‘shimcha afzalliklar quyidagilar hisoblanadi:

• auditorlik tajribasi;
• davlat tashkilotlarida ishlaganlik;
• malaka oshirish kurslari va sertifikatlar.

Shuningdek, suhbat davomida ishga qiziqishi va tashabbuskorligi yuqori bo‘lgan nomzodlarga tajriba kam bo‘lsa ham imkon berilishi mumkin.

3-ko‘nikma — bosh buxgalter va moliyaviy direktor vazifalarini birlashtirish

Kompaniyaning moliyaviy-xo‘jalik faoliyatini tahlil qilish, daromad va xarajatlarni rejalashtirish, byudjet tuzish — bu moliyaviy direktor vazifalariga kiradi. Biroq kompaniyalarning 75 foizi tejamkorlik maqsadida ushbu vazifalarni bosh buxgalter zimmasiga yuklaydi.

Bunday mutaxassislar kompaniya rahbariyatining “o‘ng qo‘li” hisoblanadi va odatda yuqori daromadga ega bo‘ladi.

4-ko‘nikma — boshqaruv hisobini yuritish

Boshqaruv hisobi rahbariyatga kompaniya faoliyatining samaradorligini baholash, loyihalar va bo‘limlarning foydaliligini aniqlash imkonini beradi. Ish beruvchilarning 71 foizi ushbu ko‘nikmaga ega bosh buxgalterlarga ehtiyoj sezadi, biroq amalda buxgalterlarning faqat 50 foizi bu talablarga javob bera oladi.

5-ko‘nikma — kadrlar ishini bilish

Kichik biznes subyektlarida kadrlar bilan ishlash vazifasi ko‘pincha buxgalter zimmasiga yuklatiladi. Shu sababli Mehnat kodeksini bilish, kadrlar hujjatlarini to‘g‘ri rasmiylashtirish va xodimlar bilan hisob-kitob qilish muhim ahamiyatga ega.

Ish beruvchilarning 67 foizi bu ko‘nikmani albatta tekshiradi.

6-ko‘nikma — muloqot qilish va jamoada ishlash qobiliyati

Bosh buxgalter diplomatik, o‘z fikrini himoya qila oladigan, hissiyotlarini nazorat qila biladigan shaxs bo‘lishi kerak. U faqat raqamlar bilan emas, balki jamoa a’zolari bilan ham samarali ishlay oladigan strategik mutaxassis hisoblanadi.

7-ko‘nikma — mas’uliyat

Bosh buxgalter katta mas’uliyatni o‘z zimmasiga oladi. Bu:

• hisobotlarni o‘z vaqtida topshirish;
• tezkor qaror qabul qilish;
• xatolar uchun javobgarlikni tan olish
  kabi jihatlarni o‘z ichiga oladi.

Ish beruvchilarning 80 foizi ushbu fazilatlarni bosh buxgalterda ko‘rishni istaydi.

8-ko‘nikma — murakkab masalalarni oddiy tilda tushuntirish

Moliyaviy va soliq masalalarini oddiy, tushunarli tilda izohlab bera olish qobiliyati bosh buxgalterning katta ustunligidir. Chunki xodimlar eng ko‘p savollar bilan aynan buxgalteriyaga murojaat qiladilar.

9-ko‘nikma — aloqalar (netvorking)

Ish beruvchilarning 40 foizi soliq organlari, banklar, jamg‘armalar va davlat tashkilotlarida foydali aloqalarga ega bo‘lgan bosh buxgalterlarni afzal ko‘radi.

10-ko‘nikma — tashkilotchilik qobiliyati

Bosh buxgalter — buxgalteriya bo‘limi rahbari. U ish jarayonini shunday tashkil qilishi kerakki, uning yo‘qligida ham barcha jarayonlar uzluksiz va tizimli tarzda ishlasin.

Buxgalteriya va reja-moliya bo‘limi

Normurodov Akmal Soatmurodovich